இன்னும் நாங்கள் எழுச்சியுடன்....

இன்னும் நாங்கள் 
அழிந்துப் போகவில்லை...
முழுசாக நாங்கள்
புதைந்துப் போகவில்லை


இன்னும் நாங்கள் 
எழுச்சியுடன்தான் 
என்றும் இருக்கிறோம் 


ஒர் இனத்தை அழிக்க 
நினைக்கும் எவனும் 
நிலைப்பதும் இல்லை

எங்கள் மீது
உங்கள் வெறுப்பான
வதந்திகளால்.....
வரலாற்றில்
கொச்சைப் படுத்தலாம்
எங்கள் வாழ்க்கையை 
கொச்சைப் படுத்த முடியாது 

எங்களை  நீங்கள்
புழுதியில் புரட்டினாலும்
அந்தப் புழுதியோடு
உயர உயரப் 
பறந்து செல்வோம்

எங்கள் மௌனம்
உங்களுக்கு
கோபமூட்டுகிறதா...?
மௌனத்தில் கிடந்தாலும்
மனச்சோர்வுடன்
இருளில் கிடக்கவில்லை 

வாழ்க்கையில் 
எங்களைச் சுற்றி
எங்கள் உறவுகளின் 
பிணக்குவியல்கள்
எங்கள் உடலில் 
எங்கள் இனத்தின் 
இரத்த அழுக்குகள்

ஆனாலும்
அந்த நிலவைப் போல 
தேய்ந்து போனாலும் 
வளர்ந்து வருவோம்
அந்தச் சூரியனைப் போல்
உங்களை  ஒரு நாள் 
சுட்டெரிப்போம் 



அந்தக் கடலில் தோன்றும் 
உயர்ந்து எழுந்து விழும்  
நம்பிக்கை அலைகளுடன்...
இன்னும் நாங்கள் 
எழுச்சியுடன்தான் 
என்றும் இருக்கிறோம் 

எங்கள் ஆத்மா
காயம்பட்டாலும்...
எங்கள் விழிகள் 
கண்ணீர் சிந்தாது.....

தோள்களில் வடியும்
கண்ணீர் துளிகளுடன்  
தொங்கிய தலையும்
வீழ்ந்த விழிகளுடனும்
நாளை  நீங்கள் 
நொறுங்கிப் போவதை
இந்த உலகம் பார்க்கும்

உங்கள்  திமிர்
உங்களைத்
திண்டாட வைக்கும்



உங்கள் வீட்டு முற்றத்தை
உற்றுப் பாருங்கள் 
எங்கள் இனத்தின் 
ஓர் அருக்கம்புல் 
இன்று முளைத்து நிற்கும் 
ஆழமாக ஆணிவேரோடு...
நாளை வளரும் அது
உங்கள் தூக்கு மரமாக 

                                                                                         ..................பரிதி.முத்துராசன்

(this is an inspirational poem on reading of Maya Angelou's STILL I RISE....) 

இப்பதிவு தங்களுக்குப் பிடித்திருந்தால்....
வலைதளங்களில் பகிருங்கள்....நன்றி!!! பதிவுகளை உடனுக்குடன் தெரிந்து கொள்ள.......
ட்விட்டரில் இணைந்து கொள்ளுங்கள்

Follow @PARITHITAMIL

வாருங்கள் வாழ்வோம் முகநூல் நண்பர்களாக...